العباس (ع)

العباس (ع)

العباس للرخصه طلب من خوه حسين

يقله علی فرقاک ما اقدر يا ضيا العين

يقله اشلون ابقی واشوف اهلي مطاعين

اشلون يصبر عن أخذ ثاره الموتور

قله يخُويه انت عضيدي اوحامل الواي

وانت عميد الجيش وانت مجمع الراي

إن کان رايح جيب إلی أطفالنا ماي

تسمع الضجه امن العطش وقلوبها اتفور

قام اورکب مهره اوتودع من عضيده

حامل الرايه والرمح والسيف بيده

والدرع والقربه اويوم الحرب عيده

نعمين ابو فاضل أخو زينب مهو اقصور

جال اوجذب سيفه اوبيها فرع الراس

صال اوصرخ بيهم او نادی أنا العباس

هاليوم أخمّد من بني اميّه الانفاس

مالي عذر بويه ذخرني اليوم عاشور

حام او قلب يمنی الحرب من فوق لشمال

اونزلت ابسيفه صاعقه اعليهم او زلزال

الخيل عقرها اولف ارجال برجال

خروا من الصيحه يظنوا نفخة الصور

رج العراق ابصرخته واتزلزل الشام

وايزيد من قصره ارتجف وامن التخت قام

الرايات لفها ابن الوصي اونکس الأعلام

ابزوده ابو فرجه لهذا اليوم مذخور

دق بالأرض رجله اوصک رمحه السماوات

هاليوم يومي امن العدی لاخذ الثارات

سبعين ألف حدهم طرد عن ماي لفرات

هيهات قلبه ما ارتجف والجيش مذعور

حتی ملک ماي الشريعه ابحد لسنان

راد الشرب واتذکر الظامي اللهفان

ذبّه اوقال اشرب وخوي احسين عطشان

يحرم عليّه الماء اوقلب احسين مفطور

الجود زمه وانثنی يبغی المخيم

همته يوصل الما اوعليه العسکر التم

قطعوا طريقه وانتخی بيها الغشمشم

شبل الوصي ليث الحرب بالکون مذکور

عريس عباس البطل والمعرکه اعروس

جاها ايتبختر بالدرع وانثارها الروس

نکّس فوارسها ابسيفه اوجدل الشوس

والأرض خلاها اتموج امن الدما ابحور

والخيل خلاها اتموج امروج بالبر

بالسيف يحصد والعزيز الروح من فر

وين الفرار اوعاث بيها الموت لاحمر

لولا قضا الباري الذي باللوح مسطور

جاه الطفيلي من وراه اوقطع يمناه

اوثنی بن ورقا بالحسام اوقطع يسراه

القربه حضنها بالصدر عجل ابمسراه

همته يوصل الما يبرد کبد لبدور

اولن السهم جاه اوفری صدره اوجوده

وسفه وقف مبهوت مقطوعه ازنوده

جا له الملعون اوضرب راسه ابعموده

طاح البطل والأرض ترجف والسما اتمور

نادی ابضعيف الصوت يا خويه ادرکني

جا له اونادی راح عزمي انهدم رکني

العباس عني راح للأعدا ترکني

قلّت الحيله اليوم ظهري اعليه مکسور

صبت ادموعه اوراد حمله للمخيم

قله دخلني اهنا نزل موت المحتم

اوسکنه امواعدها اوتقول الوعد ما تم

ايحاکيه اولن الروح فاضت وانطفی النور

© 2016 كل الحقوق محفوظة لمؤسسة المصطفى للتحقيق والنشر

Scroll to top