القاسم (ع)

جاسم طلع بدر سطع نوره امن الخيم

جا يجر سيفه يطلب الرخصه امن العم

ايقله الرخصه للحرب قلب امتلا هم

أهلي قضوا ما بين مطعونِ اومنحور

قله يرُوحي اومهجتي اوبضعة المسموم

اوريحانة اللي اشمها امن الحسن کل يوم

ما لي علي افراقک صبر هيجت لهموم

انت ابن اخويه اومهجتي اونور علی نور

جاسم غدا مهموم قلبه اوقعد وحده

خاض ابّحر فکره اوذاب امن الحزن کبده

ساعة اوذکر عوذه الحسن شدها ابزنده

فکها اوقراها وامتثل ما کان مسطور

قام ابفرح يعرض علی عمه العوذه

بس شافها هلت ادموعه علی اخدوده

اوقله يعمي هالأمر وصلت احدوده

أوصی ابهذا لک وانا بالعرس مأمور

قام اوأخذ بيده اوجابه يم لخيام

نادی أخوته اوزوج اسکينه ابجسام

وافرد إله خيمه اونادی وين لاعمام

قوموا نزفه ليش يا عباس ما اتثور

قومي يزينب عمته حني اکفوفه

اولبسيه أثوابه الجدد وامه اتحوفه

ودوا الخبر يلفي الحسن لابنه يشوفه

عريس جاسم عرس لمبارک ولسرور

ساعه خلا ابعرسه اولن عمه ينادي

ما من مغيث اولا معينِ امن الأعادي

قال العرس خله إلی يوم المعاد

في جنة الفردوس والودان والحور

لزمت اذياله اتعلقت به بنت عمه

اوعمته زينب تجذب الونّه اوتضمه

وانحنت فوقه صارخه المحزونه امه

اتودعه اوشقت جيبها والذيل مجرور

بيش اعرفک قال اعرفي ردني المقطوع

وانفجعت اهل البيت واجروا دمّ لدموع

رادوه يرجع قال اظن هيهات لرجوع

عمي وحيد ابکربلا اعليه العدی اتدور

بادر إله عمه اوضم جاسم ابصدره

واغشي عليهم بالبکا اوشدة الزفره

لما أفاقوا وانتحب جاسم ابعبره

ارخصني يعمي هالصبر لي موش مقدور

مثل الکفن فصل عليه اثياب عرسه

اشباب عمره اثلطعش ربي اتحرسة

عريس ما اتهنّی فدی عمه ابنفسه

ودّع عزيزه اوسار يم المعرکة ايدور

جاسم رکب غوجه اونزل خطة الميدان

جال اوصرخ بيها اوشب للحرب نيران

روّع اقلوب الجيش واتصيّد الشجعان

جده علي ليث الحرب بالکون مذکور

ليث الحسن عاين سليله اشلون سوّی

عطشان من دم العدی سيفه اتروّی

في کربلا بصدورهم رمحه تلوی

کبده تلظی امن العطش والقلب مجمور

نکس فوارسها اورجع يبغي المخيم

صاح انفطر قلبي ادرکني ابماي يا عم

حر اوعطش والشمس والميدان والهم

قله ابحچيک ذوبت قلبي المفطور

صبّره والخاتم خذه اوحطه ابحلقه

اوقله يروحي اومهجتي حانت الفرقه

في اوداعة الله ما بعد هساع ملقی

يسقيک جدک يا عزيزي ابکاس مذخور

رد للحرب شبل الحسن دوّر رحاها

اوظنت بني اميه ابو الحسنين جاها

صال اوجعل همته علی حامل الواها

جدّل ضياغمها اورد للمعرکة ايدور

تالي الأمر حاطوا عليه بسيوف وارماح

وانبال حتی وزعوا جسمه بلجراح

الأزدي ضرب راسه ابسيفه اوللأرض طاح

اسم الله علی اشبابه وقع للقاع معفور

ينده ابعمه اشحال قلب احسين من جاه

شافه امطبّر بالثری معتفر بدماه

صب الدمع عنده اوحنی ظهره أويلاه

المشتکی لله يعمي اوقام مذعور

شاله إلی الخيمة ابنفسه اشلون صبره

جاسم يخط باقدامه اوصدره اعلی صدره

جابه لخوته اومدده اونادی ابعبره

قومن ينسوه جاسم العريس منحور

قوموا ابهلاهل من بدال النوح يمه

عريس شبل المجتبی امحنّی ابدمّه

قومي يزينب يا سکينه انهنّي امّه

اوعمه وابوه ابزفة المعرس للقبور

بهداي تکّن له اونسلن شعر راسه

اوحلّن ادروعه مبهظه درعه اوطاسه

باسم الله عليه من طاح مخموده انفاسه

مطعون قلبه بالرمح والراس مطبور

هلهلن للعريس ساعة اوبطلن النوح

صبن ادموع اوغسلن اخدوده ولجروح

عريس في يوم العرس يا حيف مذبوح

يهنيک عرسه يا حسن بالولد مأجور