الإمام الحسين ( ع )

الإمام الحسين ( ع )

احسين ظل وحده يلوج اويصد بالعين

ينظر انصاره اوکلّ اهل بيته مطاعين

ظل يستغيث اويستجير اوما له امعين

قام اورکب غوجه اومنه الدمع منثور

أوچب علی اصحابه اونادی ابدمع ساجم

مسلم حبيب اهلال عون ابرير جاسم

يبني علي عباس اخويه ليش نايم

قوموا اوحاموا يا ضياغم دون لخدور

قام العليل ايلبي الدعوه بلونين

نادی عليّه بالعصا والسيف هالحين

باروح يا عمه اجاهد دون لحسين

اشلون اظل واحسين بيه العسکر ايدور

وام المصايب زينب الحورا اتنادي

انت عليل ارجع ولا اتذوّب افادي

اونادت اخوها احسين يا عزي واسنادي

ادرک عليلک بالمرض مشغول معذور

جاه لحسين ابنفسه اوردّه للخيام

ايقله يبويه انت الخليفه اکفل الأيتام

انت إمام الناس بعدي اوعلم لسلام

ما تنذبح لکن اتروح ابقيد مأسور

اوصيک يبني بلغ الشيعه سلامي

قلهم ابويه اغريب مات ابلا محامي

ابکوا عليه ابکربلا عطشان ظامي

اوندبوه کل ساعه لحتی ينفخ الصور

رد للخيام اوصاح ياهلي اوداعه الله

باروح عنکم من عبد عيني الکُم الله

باري لي اطفالي يزينب الله الله

باري اليتامی والعليل ابني المأسور

زينب يکلثم يا رباب اويا رقيه

ليلی يفاطم يا سکينه يا زکيه

باروح انا عنکم ولا لي بعد جيه

صبروا علی مصابي ولا اتنشرون لشعور

دارت عليه اطفاله واعياله اوبنينه

ودع بناته اوبالدموع ارخی اعيونه

صاحوا ابصيحه اوداعة الله راح ابونا

راح الذي نلجأ الظلّه او للحرم سور

نوره سطع سيفه لمع وجهه تبسم

وانخطفت الوان العدی والکون أظلم

اوثار العجاج ابکربلا والجو غيم

حاشاه ما مثله أسد أو يشبه اصقور

ماله شبيه إلاّ علي مظهر الدين

ذکر ابيومه يوم بدر اوأُحد وحنين

ذب يمنه ابيسری اولف قلب ابجناحين

ما يکترث بالآفهم لو کانت اکرور

شبه الوصي شبه النبي خيرة الأنجاب

جدّل فوارسها اوخلاها بلتراب

ما يرتجف قلبه ولا امن آلآفهم هاب

ضاقت فيافي الأرض بالقتلی ولبرور

دارت علی احسين الشهيد العسکر اصفوف

أربع فرق ناس ابرماح اوناس بسيوف

اوناس ابحجاره اوناس ترمي اسهام لحتوف

مثل السواد امحيط واصبي عينها ايدور

قلبه تلظّی امن العطش واثقل اسلاحه

حر الشمس نزف الدما کثرة اجراحه

أوچب عزيز المصطفی قصده استراحه

شافت اعاديه من جبينه يسطع النور

ضربوا جبينه بالحجر والدم فجر

ابثوبه مسح دمه اولن سهم لمقدر

مسموم في قلبه وقع الله أکبر

لمّن هوی ماج العرش وتدکدک الطور

طاح السبط والمهر قام ايحوم يمه

عنه يرد القوم وايجنح يشمه

وجهه اوناصيته خضبها ابفيض دمه

صاح الظليمة اونحا الخيمة ابصرع مجرور

سمعن صهيله اوطلعن النسوه ابهمه

اولنه خلي من راکبه اوسرجه امدمّه

فرّن من الخيمه ابدهشه اوإجن يمّه

اولنّ الشمر جاثي عليه والسيف مشهور

واتساقطن فوق الکفيل ابقلب احزين

اوصاحن دوخّر يا شمر عن صدر لحسين

تذبح ولينا عقب فيّه نلتجي وين

ما اتراقب الله تحط سيفک والدم ايفور

ما راقب الله اوظل يحز النحر بالسيف

والراس شاله فوق راس الرمح يا حيف

کبر العسکر بالفرح طاب الهُم الکيف

لحسين واهله اتذبّحوا وايزيد مسرور

سلبوا اهدومه اوبرنسه اوسيفه اودرعه

اوبجدل إجا السلبه اولقا الخاتم ابصبعه

الدم جمد فوقه اوأخد خنجر يقطعه

حتی فصلها والأرض من أجله اتمور

واللي هدم رکن المجد والعز والدين

بن سعد نادی من يرض اضلوع لحسين

اورکبوا إلی الخيل اوحوها في الميادين

کسّرت صدره ليت صدري هو المکسور

صدر حوی کل العلوم اوکل تنزيل

صدر تربيه البتول اترضه الخيل

ليت الخيول اتعقرت يا ويلها الويل

رضت اعظامه اوسوته ميدان معمور

اوزينب اتعاين والدمع عالخد همال

اوتصرخ ابعالي الصوت يا خويه يسردال

ابليا غسل تبقی رميّه فوق لرمال

تجهيزک اترضک عواديهم يمبرور

Leave a Comment

You must be logged in to post a comment.

© 2016 كل الحقوق محفوظة لمؤسسة المصطفى للتحقيق والنشر

Scroll to top